Telefonica eta Movistarreko autonomoen borrokak LABen babes eta elkartasun guztia du

Bi hilabete daramate Telefónicak eta Movistarrek azpikontratatutako autonomoek borrokan. Bi hilabete, duintasun eta zilegitasun guztia duen borroka eredugarri horretan, multinazional prekarizatzaile horri aurre egiten.

Telefónicak urteak daramatza langile eredua aldatzen. Lehen langile propioen bidez egiten ziren funtzioak orain azpikontratatzen dituzte, egoera prekarioan dauden azpikontratetako langile eta automoak estutuz. Eredu aldaketa horrek ez du mugarik, prekarizazio prozesu hori ez dute geldituko. Guk geuk, langileok, gelditu behar dugu.

Telefónica eta Movistarrek langileen kontrako prekarizazio prozesuarekin aurrera egiten dute. Azken bi urteetan multinazionalak 7,594 miloi euro irabazi arren langileen kontrako lapurreta aurrera doa. Asezinak dira. Guztia kendu nahi digute.

Langileok behar dugun konponbidea Telefónicako eta Movistarreko eredua gelditzea da. Azpikontratazio eta prekarizazio prozesua geldituz lortuko da garaipena. Horretarako prekario dauden langileen aktibazioa da gakoa, eremuz eremu, Telefónicako langileetatik hasi eta azken autonomoraino, denak elkarrekin, denon prekarizatzailea denaren kontra. 

Honengatik guztiagatik LABek babestu egiten ditu datorren astean eta hurrengoan Telefónicako langileek egingo dituzten elkartasun-lanuzteak. Aurrera begira saiatuko gara erantzun zabalago bat antolatzen.